Трамп навишт, ки «гуфтугӯҳои хубе бо президенти муҳтарами Лубнон Ҷозеф Аун ва сарвазири Исроил Бинёмин Нетаняҳу дошт», ки барои ноил шудан ба сулҳ байни ду кишвар дар бораи оташбаси 10-рӯза ба мувофиқа расиданд.

Барои таъмини натиҷаи устувор, Трамп ба ноиби президент Ҷей Ди Вэнс, вазири умури хориҷа Марко Рубио ва раиси Кумитаи муштараки сардорони ситодҳо генерал Дэн Кейн супориш дод, ки бо тарафҳои исроилӣ ва лубнонӣ ҳамоҳангӣ кунанд.

Трамп инчунин эълом кард, ки сарвазири Исроил Бинёмин Нетаняҳу ва президенти Лубнон Ҷозеф Аунро ба Кохи Сафед барои аввалин гуфтугӯҳои мустақими раҳбарон дар беш аз 30 сол даъват мекунад.

«Ҳар ду тараф мехоҳанд СУЛҲро бубинанд ва ман бовар дорам, ки ин зуд рух хоҳад дод!» — навишт Трамп.

Дар паси ин талошҳои дипломатӣ, сарвазири Исроил Бинёмин Нетаняҳу ҷаласаи фаврии кабинети амниятро оғоз кард. Бо вуҷуди эълони танаффус, раҳбари ҳукумати Исроил қаблан аз қатъият барои идомаи амалиёт то пурра бартараф кардани таҳдидҳои «Ҳизбуллоҳ» изҳор дошта буд. Вай қайд кард, ки нерӯҳои исроилӣ аз сарзаминҳои ишғолшуда хориҷ нахоҳанд шуд.

«Мо наздик ҳастем, ки (шаҳри ҷануби Лубнон) Бинт-Ҷубейлро гирем. Мо аслан наздик ҳастем, ки ин қалъаи бузурги «Ҳизбуллоҳ»-ро нест кунем», — гуфт ӯ.

Вай хабар дод, ки ба Артиши мудофиаи Исроил дастур додааст, ки «минтақаи бехатариро дар ҷануби Лубнон васеъ кунад ва онро ба самти шарқ, ба сӯи нишебиҳои кӯҳи Ҳермон паҳн кунад».

Дар ҳамин ҳол, сарфи назар аз эътибор пайдо кардани режими қатъи амалиётҳои ҷангӣ байни Исроил ва Лубнон, дар соатҳои аввали оташбаси эълоншуда, ЦАҲАЛ ба тирборони шаҳрҳои лубнонии Ал-Ҳиём ва Дбайбин дар ҷануби Лубнон идома дод. Тавре ки агентии миллии лубнонии NNA хабар дод, ба шаҳрҳои мазкур зарбаҳои артиллерӣ зада шуда, инчунин тирборони пулемётӣ сурат гирифт. Ғайр аз ин, дар минтақаи Бекоаи Ғарбӣ ҳамлаҳои бо истифода аз бепилотҳо ба қайд гирифта шуданд, менависад РБК.

Тарафи лубнонӣ дар бораи оқибатҳои ҷиддии башардӯстонаи низоъ хабар дода, аз аввали март беш аз 2000 нафар кушта шудан ва тақрибан 1 миллион гурезаи дохилӣ мавҷуд буданашро изҳор дошт.

Исроил ва Лубнон дар ин ҳафта дар Вашингтон гуфтугӯҳоеро оғоз карданд, ки ба бастани созишномаи сулҳ нигаронида шудаанд. Байни ин кишварҳо муносибатҳои дипломатӣ вуҷуд надоранд.

Ҳамаи хабарҳо дар бораи ҷанг дар Ховари Миёна дар сюжети мо хонед.